Wohi Larki Episode 1

Wohi Larki…

Gali k nukkar par chaye ka woh purana hotel un doston ki pasandeeda jaga thi.shaam ki chaye woh roz wahin peete the.Us chote se chaye k hotel mein ginti ki kuch meizein aur kursian rakhi hoti thin jo un doston k group k ilawa kuch aur logon ki aamad se khacha khach bhar jatii.Hotel k maalik (Jan Ali kaka)ek khush mizaaj aur milan nisar aadmi the.Ye paanch dost kaka k sab se pasandeeda gahak the.woh bhi aksar inn k sath gup shup mein shamil ho jate.

Sardi ki us sham woh dost garam garam chaye k mazey le rahe the.khank aur tund hawaon k sabab gali mein log na hone k braber the.Mosam ki shiddat aur hawaon ki tundi ne zor pakra to unho ne apni khatam hoti hui chaye k cup andar le jane ka socha.Hath mein chaye ka cup pakre woh ander jane k liye uthe he the k usi waqt hawaon k taiz jhonkon se ek bari si chaadar kahin se urr kar ain hotel k samne rakhi maiz aur kursion k beech aa kar phans gai.

Abhi woh teh bhi nahi kar paye the k woh chaadar kis simt se aai hogi k behangam tareeke se bhaagti aur zaaro qataar roti hui ek nojawaan larki apni chaadar dhoondne k liye diwana_war idhar udhar dekhne lagi.Maare pareshani k samne kursion k beech phansi,khaak mein latt patt woh chaadar usey nazar nahi aa rahi thi.us ki bari bari aankhon se kajal beh kar us k gaalon par phail raha tha jisey woh musalsal apne haathon ki pusht se saaf kar rahi thi.Woh bala ki haseen thi!gehri saanwli rangat par bari bari aankhein aur un mein bhara kaajal.

Woh gehre kaale rang k bikhre baalon mein qayamat dha rahi thi.Woh sab aankhein phaarey us larki ko ghoor ghoor kar dekh rahe the.Achanak us larki ki nazar apni chaadar par parhi aur woh ek lamha zaiya kiye baghair us par lapki aur bina jhaarhe forun ussey orha,un k paas se guzarti hui un par ek sarsari nigah dali aur bhaagti hui un nigahon se ojhal ho gai.Arey yar,tum logon ne dekha us bala ko,kia ghazab ki larki thi!Uff yar tum ne zalim ki aankhein dekhi..aur us ka jism to…dekh he kahan paate hum us haseena ko!agar aaj ye hawayein maherban na hoti to…..Mudassir jane kia kia bolta ja raha tha lekin Mazhar ek ghoorti nigah daalte hue apna cup bahir maiz par chhorh kar taiz qadmon se apne ghar ki taraf chal parha.

Woh sab mazhar k mazhabi rujhan aur islami khayalat se waqif the iss liye usey jane diya aur khud baaton mein lag gaye..Agley din woh sab sham ko chaye peene hotel pohnche to khilaaf e maamool hotel k darwaze par taala laga hua tha..un ko bohot hairat hui kyon k aisa pehle kabhi nahi hua tha.Un sab doston ne agley din milne ka waada kar k apni apni raah li lekin agley din bhi hotel na khula aur yahi mamool raha to sab ko fikar laahaq hui.baahmi salah o mashware se ye teh paaya k Mazhar aur Mudassir hotel k maalik(jan ali kaka)ki khairiat daryaaft karne jayein gey…………To be Continued