Ek Chaye ki Piyali

Ek Chaye ki Piyali…

Mey cousin marriage k khilaaf tha to meri biwi cousins k he khilaaf thi,phir bhi hamari shadi ho gai,

aisa nahi hai k hamari mohabbat ki shadi thi balkay sach to ye hai k zid ki shadi thi,gussey ki shadi

thi,intqaam ki shadi thi,bachpan sara lartey hue guzra tha,ussey mey pasand nahi tha aur mujhe

woh kabhi ek aankh nahi bhayi thi magar ghar walon ne hamare gathjorh ka faisla kar liya

to na phir mere ghar chhorne ki dhamki kaam ai aur na he us k zaher khaney k dramey ne koi kaam

kiya.

Shadi ki raat woh bed par ghoonghat phailaye meri muntazir bhi na thi,jab mey kamre mein daakhil

hua to dil he dil mein iss ki gardun marorne aur us ko qatal kar daalne k bohot se iraade bana k rud

kar chuka tha aur woh “jaye namaz”par beithi hichkiyan le rahi thi,shayad ro rahi thi,tab mey ne jana

k majboor sirf mey nahi tha woh mujh se ziada majboor thi.Zindagi mein pehli baar us k aansoo’on

mera dil zakhmi kiya.woh apna ghar, apne maa baap,bahen bhai aur dost sab chhor kar mere liye ai

thi aur mey us ko zid banaye beitha tha,mujhe us ko jhukane ka shok tha aur us ko rotey dekh kar mere seene mein jo dard jaga tha mey ne socha agar ye waqayi jhuk gai to kia mujhe khushi ho gi?dil se awaaz ai k mujhe phir na kehna dharhkne k liye,mey forun kamre se bahir nikal gaya.jab 10 minute baad mey chaye ki do piyalian liye kamre mein daakhil ho raha tha to woh aansoo saaf karte JayeNamaz samait rahi thi.

mey ne us k hath se JayeNamaz le kar kursi par rakhi aur chaye ki piyali us k hath mein,us k chehre ki hairat mujhe lutf dene lagi thi,Mey ne muskura kar poocha:”kia chaye ki piyali itni taqatwar hai k bachpan k dushman dost ban jayein?”                                                                                                                                                                                                        woh ek dam khilkhila kar hansi aur mujhe jawab mil gaya..“Han bilkul chaye ki piyali mein itni taqat hai k saalon purani dushmani dosti mein badal sakti hai”.